Правілы дарожнага руху для раварыстаў

Агульныя палажэнні:

Ровар – транспартны сродак, які прыводзіцца ў рух мускульнай сілай чалавека. (арт. 2.5)

Кіроўца – фізічная асоба, якая кіруе транспартным сродкам. (арт. 2.8) Такім чынам, раварыст – кіроўца транспартнага сродка.

Дарога – комплекс інжынерных збудаванняў або паласа зямлі, якія прызначаны і выкарыстоўваюцца для руху ў вызначаным парадку транспартных сродкаў і пешаходаў. (арт. 2.15)

Элементы дарогі – адна або некалькі праезных частак дарогі, трамвайныя пуці, ходнікі, пешаходныя і роварныя сцежкі (за выключэннем роварных сцежак, размешчаных адасоблена ад дарогі), пасадачныя пляцоўкі, размешчаныя на праезнай частцы дарогі і прызначаныя для пасадкі (высадкі) пасажыраў у маршрутны транспартны сродак, выспы бяспекі, вылучаныя канструктыўна або лініямі гарызантальнай дарожнай разметкі, раздзяляльныя зоны, раздзяляльныя палосы, насцілы чыгуначных пераездаў і ўзбочыны. (арт. 2.78)

Пешаходная сцежка – вылучаны канструктыўна ці з дапамогай ліній гарызантальнай дарожнай разметкі элемент дарогі, прызначаны для руху пешаходаў, пазначаны дарожным знакам «Пешаходная сцежка». (арт. 2.47)

Роварная сцежка – адасобленая дарога або вылучаны канструктыўна ці з дапамогай ліній гарызантальнай дарожнай разметкі элемент дарогі, прызначаныя для руху кіроўцаў ровараў (далей – раварысты), пазначаны дарожным знакам «Роварная сцежка». (арт. 2.6)

Узбочына – вылучаны канструктыўна ці суцэльнай лініяй гарызантальнай дарожнай разметкі элемент дарогі, які прымыкае непасрэдна да знешняга краю праезнай часткі, размешчаны з ёй на адным узроўні і не прызначаны для руху транспартных сродкаў. (арт. 2.34)

Ходнік – элемент дарогі, які прымыкае да праезнай часткі або аддзелены ад яе газонам, прызначаны для руху пешаходаў і раварыстаў. (арт. 2.72)

Пешаходны пераход – участак праезнай часткі, прызначаны для руху пешаходаў праз праезную частку дарогі і пазначаны дарожнымі знакамі «Пешаходны пераход» і (або) гарызантальнай дарожнай разметкай. (арт. 2.49)

Праезная частка дарогі – элемент дарогі, прызначаны для руху транспартных сродкаў, і ў выпадках, прадугледжаных дадзенымі Правіламі, — для руху пешаходаў. (арт. 2.55)

Рух раварыста

148. Рух на ровары павінен ажыццяўляцца па роварнай сцежцы, а пры яе адсутнасці – па ўзбочыне, ходніку або пешаходнай сцежцы, не ствараючы перашкоды для бяспечнага руху пешаходаў. Пры адсутнасці названых элементаў дарогі ці немагчымасці руху па іх дапускаецца рух раварыстаў па праезнай частцы дарогі ў адзін шэраг не далей за 1 метр ад яе правага краю. Пры гэтым:

148.1. выезд далей за 1 метр ад правага краю праезнай часткі дарогі дапускаецца толькі для аб’езду перашкоды і ў дазволеных выпадках для павароту налева ці развароту;

148.2. калоны раварыстаў пры руху па праезнай частцы дарогі павінны быць падзелены на групы не больш чым па 10 раварыстаў. Адлегласць паміж групамі павінна складаць не менш за 100 метраў;

148.3. пры наяўнасці на праезнай частцы дарогі лініі гарызантальнай дарожнай разметкі, якая пазначае яе край, гэтая лінія павінна размяшчацца злева ад раварыста.

149. Пры руху па дарозе ў цёмны час сутак і (або) пры яе недастатковай бачнасці на ровары павінны быць уключаны: спераду – фара (ліхтар), якая выпраменьвае белае святло, ззаду – ліхтар, які выпраменьвае чырвонае святло.

Рух раварыста ў жылой зоне

Рух транспартных сродкаў у жылой і пешаходнай зонах, на прылеглай тэрыторыі дапускаецца пры ўмове прыняцця кіроўцамі ўсіх мер па забеспячэнні бяспекі пешаходаў, раварыстаў, іншых удзельнікаў дарожнага руху. (арт.133) Пры выездзе з жылой і пешаходнай зон, прылеглай тэрыторыі кіроўцы павінны саступіць дарогу транспартным сродкам, якія рухаюцца па дарозе, а таксама пешаходам, раварыстам і коннікам, шлях руху якіх яны перасякаюць. (арт. 136)

Раварыст, як кіроўца транспартнага сродку, мае права:

1. кіраваць транспартным сродкам у вызначаным парадку;
2. ведаць прычыну, па якой супрацоўнікамі ДАІ, іншымі службовымі асобамі спынены транспартны сродак, а таксама прозвішча і пасаду гэтых асоб. Пры гэтым асобы, якія валодаюць правам правяраць у кіроўцы дакументы, абавязаны прад’явіць па патрабаванні кіроўцы службовае пасведчанне.

Раварыст абавязаны:

1. Спыняцца па патрабаванні супрацоўніка ДАІ ў форменным адзенні, а таксама іншых службовых асоб. (гл. арт. 9)
2. Па-за скрыжаваннямі на нерэгулюемым скрыжаванні веласіпеднай дарожкі з дарогай раварыст абавязаны саступіць дарогу транспартным сродкам, якія рухаюцца па гэтай дарозе. (арт. 150)
3. Пры перасячэнні праезнай часткі дарогі па пешаходным пераходзе раварыст павінен весці веласіпед побач з сабой і кіравацца патрабаваннямі, прадугледжанымі Правіламі для руху пешаходаў (арт. 151). Большасць раварыстаў не выконваюць дадзенае правіла.

Раварыстам забараняецца:

1. Выкарыстоўваць тэхнічна няспраўныя ровары (арт. 153.1).
2. Рухацца, не трымаючыся за руль і (або) не трымаючы ногі на педалях (арт. 153.2).
3. Паварочваць налева ці разварочвацца на дарозе, якая мае трамвайную каляю, і на дарозе, якая мае больш за адну паласу для руху ў дадзеным кірунку (арт. 153.3).
4. Рухацца па дарозе ва ўмовах снегападу і (або) галалёдзіцы (арт. 153.4).
5. Перавозіць пасажыраў, за выключэннем перавозкі на ровары дзяцей ва ўзросце да сямі гадоў на дадатковым спецыяльна абсталяваным сядзенні (арт. 153.5).
6. Перавозіць грузы, якія выступаюць больш чым на 0,5 метра па даўжыні або шырыні за габарыты ровара, а таксама грузы, якія замінаюць кіраванню роварам (арт. 153.6).
7. Асобам, маладзейшым за чатырнаццаць год, кіраваць роварам на дарозе без суправаджэння паўналетняй асобы (акрамя пешаходных і жылых зон, ходнікаў, роварных і пешаходных сцежак) (арт. 154).
8. Буксіроўка ровара і роварам, за выключэннем роварнага прычэпа прамысловай вытворчасці (арт. 156).
9. Рух па аўтамагістралях (арт.131), а таксама:
10. Кіраваць роварам у стане алкагольнага ап’янення або ў стане, выкліканым ужываннем наркатычных сродкаў, псіхатропных рэчываў, іх аналагаў, таксічных або іншых адурманьваючых рэчываў (арт. 10.1).
11. Кіраваць роварам у стане хваробы ці стомы, які ставіць пад пагрозу бяспеку дарожнага руху, пад уздзеяннем лекавых сродкаў, якія зніжаюць увагу і хуткасць рэакцыі (арт. 10.2).
12. Карыстацца падчас руху на ровары апаратам радыё- і тэлефоннай сувязі, не абсталяваным тэхнічнай прыладай, якая дазваляе весці перамовы без выкарыстання рук (арт. 10.4).